Di Price Fi Life By Kenneth Grant

Rain a fall

Dutty tuff

Jesus dead pan di cross

Between two cruff

Di soldier dem a laugh

Him clothe it rip off

Woman hole dem belly and bawl

Waaaaaaaaay!

Him neva trouble nuhbady

Dem charge him fi blasphemy

But is not that

Is talk fi mi Him talk fi mi

Dem kill Him because Him talk fi mi;

Him sey Him come fi give mi life

Politician, Religious fanatics give Him a fight

Him sey Him come fi liberate

Dem kill Him, sey is evil dem hate

Which evil, man still a create.

Rain a fall

Dutty tuff

Jesus dead pan di cross

Between two cruff

Di soldier dem a laugh

Him clothe it rip off

Woman hole dem belly and bawl

Waaaaaaaaay!

But is earth runnings

Him did tell dem still

Sey the temple woulda dismankle

Den reassemble in three days

Cow inna pasture a graze;

Him look down from di cross

And although Him a feel pain

Him still coulda have sympathy

Cause Him did know bout prophecy.

Rain a fall

Dutty tuff

Jesus dead pan di cross

Between two cruff

Di soldier dem a laugh

Him clothe it rip off

Woman hole dem belly and bawl

Waaaaaaaaay!

But dem stanup and a mock Him

Jeer and spit pan Him

And Him mother, she couldn’t tek it

Bredda John him couldn’t stop it

But Him Faada di building Him shake it!

Run and fret weak heart

Now that the place get dark

Mek wi si who have the last laugh.

Rain a fall

Dutty tuff

Jesus dead pan di cross

Between two cruff

Di soldier dem a laugh

Him clothe it rip off

Woman hole dem belly and bawl

Waaaaaaaaay!

Now the doubters all have faith

Everyone believe Jesus is great

Yet some a wonder

Still a ponder

Why Him neva come down from the cross

Box down two soldier who did a laugh

Lead a coup fi overthrow Ceaser

Understand yu fi understand yu leader

Life is not thirty piece a silver.

Dem sell Marcus Garvey

Fi rice and peas

Easter dem a sell Jesus fi bun and cheese

Fi him life worth more dan fi a King

The Lamb of God

Tek weh all a wi sin

The Lamb of God

Tek weh all a wi sin.

Ken Gee

R….

Note: This poem got a Silver in the JCDC Literary Arts Competition.

About the writer:

Kenneth Grant has been writing from the early 1980s and has won awards and recognition in Jamaica’s annual National Literary competition. These were mainly in the poetry and short story categories.

Kenneth is a Chartered Accountant having attained his ACCA qualification in 2003, and writes whenever he feels inspired. He likes to explore the dynamics of words and phrases thus his love of poetry and short stories.

He is a past student of Camperdown High School and is married to Hennis. They have three children.